ثقافة الأفلام

علي الرغم من عدم سعة مداركي و قلة تطلعي علي الأحداث أو الأخبار ,الا اني باشووف حاجات كتييير في حياتي اليومية و بتعرض لمواقف بغض النظر عن طبيعة المواقف دي ايه ؟؟ المهم فيها انها بتسيب حفرة جوايا ...... أو مش بتسيب حفرة يعني!!!!! بتجري جوايا حاجات كنت مستعجبة هي كانت مستخبية فين؟؟؟ فعلا مش لازم الانسان يكووون معاه شهادات و متعلم عشان يقدر يحلل الأمور صح و يحكم عليها الحكم اللي تستاهله ... أقولكوا رأيي ده يحمل تحت طياته ايه ؟؟؟ معظم الناس السياسية زيادة عن الازم أو اللي عندها نزعة دينية أو اللي مش عاجبها حالها (و دول مفيش أكتر منهم) و اللي مش عاجبهم حال البلد و عايزين يبيعوا اللي وراهم و اللي قدامهم عشان يخربوها ... قصدي يطورووها .. يعني كل ماتحصل حاجة مش عاجباهم أو متغاظيين منها يروحوا يحكووها لحد فافي كدة مالووش في أي حاجة و يكون مش عارف أصلا اللي حصل و حصل ليه و عشان مييين... يفتكر و هما بيتكلموا فيلم حصل فيه موقف مشابه بعيد عن طريقة معلجة السيناريو للموقف و يقولك (سبحان الله) ... فاكر الفيلم الفلاني لما مش عارف مين نزل في الشارع و كلم ميين ... المهم أخينا المتمرد ميعجبوش الكلام و يقوله أفلام ايه و زفت ايه.. ايه الهيافة دي!!! شوف أنا بكلمك في ايه و انت بتكلمني في ايه!!! جتكوا القرف مليييييتوا البلد ... مع ان الرجل مقالش حاجة غلط مع انه ماشي جنب الحييط وواخد الحياة ببساطة و مفيش حاجة فارقة معاه من اللي بيحصل ده الا ان الفيلم اللي افتكره باللي حصل عرف يخش جواه و يفهمه سياسة الدنيا و يمثله اللي بيحصل من خلال مجموعة شخصيات و سيناريو و شوية ديكوور و قدر ينزل للمشاهد من غير أي تصنع أو تكلف أو ادعاء .... أنا هديكم مثال عندكم مثلا فيلم بحب السيما ,الفيلم ده اتهاجم قد ماتهاجم من النقاد و اترفع من دور العرض أثناء عرضه في السينما .. حد من الناس العظييمة دي تعبت نفسها و كلفت خاطرها و عرفت تحلل الفيلم ده من باطنه .... هما في رأيهم ان ده فيلم مبتزل فيه اهانة لطائفة معينة من الشعب و كله مشاهد (قليلة الأدب) و ناس عمالة بتشتم في بعضها بألفاظ (وحشة) و تضرب في بعضها و خلاص علي كدة... الفيلم ده بيعبر عن ناس مخنووقة مسيرة مع الروتيين اليومي اللي تبات فيه تصبح فيه شايفين انهم لازم يلزموا حدودهم في كل حاجة حتي في طريقة الكلام و طريقة التفكيير و لو بينهم و بين نفسهم و بقوا شايفيين ممارسة هواياتهم و محاولة تحقيق و لو جزء من أحلامهم شكل من أشكال الخروج عن الأدب و التمرد اللي مالوش أي معني أو لازمة ,فبيترتب علي كدة انهم بيفقدوا الوسطية ,ياما يبقوا مؤدبيين قوووي يااما ميبقاش عندهم حياء خالص ... بيطلع من وسط الناس دي ولد صغيير عنده 10سنيين , بيقولوهم ثقافتكم و عادتكم و تقاليدكم و طريقة تفكيركم متلزمنييش ,أنا بحب السيما ,بحب الحرية,بحب التفاهم ,عايز أعبر عن رأيي و أقوله من غير ما يكون في ضغط عليا ... هل انتوا شايفييين ان المخرج أو المؤلف كان لازم يطلع يقوول عايزين حرية-عايزين حرية لحد ما الفيلم يخلص ,زي مابيحصل في بعض الأفلام اللي معظمنا للأسف بيصدقها و بيبقي عايز يتفرج علييها بدل المرة 15 ألف مرة .. طبعا لا ,الفيلم لازم رسالته توصل عن طريق مخ المشاهد و تجاربه و أسلوب تفكيره و مشاعره الداخلية مش بالصوت العالي و الجعجعة .. و هلما جرجر من الأفلام كتييير اللي محدش بيفهم رسالتها صح .. و في الختام أحب أشكركم و أقولكم ان الأفلام دي أفضل طريق للوصول لحقوقنا بس لما نعرف الأول حقوقنا بتتكلم عن ايه.....

افتتاحية

السلام عليكم و رحمة الله و بركانه .. و عشان نبقي محايدين في التحية شوية .. أقولكم مساء الخير أو صباح الخير لااااااااااااا ... دي برده متوقفة علي التوقيت المحلي لأي مديينة... طب أقول أهلا بيكم .. حلو كدة .. كفاية كدة أكيد زهقتكوا أعرفكم بنفسي أنا اسمي خلود و بينادوني خوخة... طالبة في كلية الهندسة قسم اتصالات ... ..... أصلي مش عارفة أقول ايه تاني عن نفسي ؟ باختصار كدة أنا لسة عاملة مدونة جديدة متستغربووش من اسمها"خلود المهووسة" لأني الصفة دي عايزة أقولكوا انها قارفاني في عيشتي و قارفة ناس كتييير جدا مني ... أتمني اني مبقاش دمي تقيل عليكم و أقدر أنقلكم انطباعاتي و أرائي اللي مش بقدر أقولها بالكلام الحي لكن أتمني اني أقولها بالكلام المقروء

أول لقاء